اجمل صوره لأجمل انسان😍😍

يا ترى انت علاقتك بنفسك شكلها ايه ؟ ولو سألتنى ايه السؤال الغريب ده ،وايه العنوان العجيب ده حا أقولك ان العلاقه دى بتحدد شكل الحياه اللى انت بتعيشها لانها بتأثر على قراراتك اللى بتاخذها بناءً على الصوره اللى انت وأخذها عن نفسك،بمعنى لو كنت شايف نفسك فاشل ومش بتكمل اى موضوع تبدأ فيه حا تلاقى حياتك عباره عن سلسله من الإحباطات والمحاولات الفاشله والعكس لو كنت شايف نفسك شخص ناجح عندك اصرار وعزيمه على تحقيق النجاح حا تلاقى حياتك مليانه بالنجاح والشعور بالسعاده والانجاز،طيب لو حد سألنى وقالى اذاى اقدر أغير من شكل نفسى اودامى ؟رغم أنى شايف ان الصوره اللى انا مكونها عن نفسى واقعيه،الإجابه على الكلام ده حا تكون فى نقاط محدده علشان الكلام يبقى واضح وسهل التنفيذ باءذن الله
أولاً : ربنا خلق الانسان فى احسن صوره ولديه مقومات الحياه السعيده
ثانيا: الصوره السلبيه اللى فيها ألوان قاتمه اللى بتكوينها عن نفسنا هى بتكون فى الغالب نابعه من راى الاخرين فينا وهو لا يمثلنا لانه نابع من ارائهم ومعتقداتهم،او بتكونها احنا عن نفسنابناء على تفكيرنا السلبى اللى بيركز على العيوب ويتجاهل المميزات،ومع الوقت بتكبر عيوبنا اودامنا لاننا مركزين عليها وبتختفى الحاجات الحلوه من الصوره طيب الحل ايه علشان أحب نفسى وأشوفهافى اجمل صوره،واعيش حياه جميله وسعيده؟ الحل حا نلخصه فى الآتى:
١-اولا لازم تعرف نقاط القوه اللى عندك وتركز عليها علشان تكبراودامك وتدى لون مبهج للصوره،وبالنسبه للعيوب : خد الامور ببساطه لان ما فيش حد خالى من العيوب وخد عهد على نفسك بأنك حا تبدأ تصلح من نفسكوتتخلص من عيوبك واحده واحده
٢-تحديد اهدافنا فى الحياه ووضع خطه لتحقيقها وكل خطوه بنخطوها ناحيه اهدافنا بيحلى شكل صورتنا اودام نفسناوبنحبهاكل يوم اكتر
٣-حاول تتخيل انك حققت أهدافك وروح المكان اللى انت نفسك توصله كل يوم عشر دقايق فى خيالك وحس بالمشاعر الجميله اللى انت نفسك تحس بها لما تحقق هدفك،وياريت تعمل ده وانت صاحى من النوم ورايق او وانت فى اخر يومك وعلى سريرك مسترخي وقربت تنام والتمرين ده مهم فى زياده ثقتك بنفسك وقدرتك على تحقيق أهدافك وكمان بيزود شعورك بالسعاده وبيحلى الدنيا فى عينك
٤- عقلك عامل ذى الراديو والأفكار فيه ذى المحطات نقدر تضبطه على المحطه اللى انت عايزها ولو فعلاً عايز تحسن صورتك اودام نفسك لازم تشجعها وفى اخر كل يوم تفكر فالحاجات الكويسه اللى انت عملتها واتبسطت بها فى يومك (٣حاجات مثلاً) وتنام وانت على وشك ابتسامه جميل ونيه انك حا تعمل بكره باءذن اللهولو حاجه واحده ايجابيه جديده فى اليوم الجاى، وبكده تبقى اتحكمت فى اول وآخر اليوم ودى اهم حاجه تضبط بها يومك وحياتك وتحسن صورتك عن نفسك
٥- وآخر نقطه معانا انهارده هى شويه نصائح حا تساعدك جداً انك تشوف نفسك فى اجمل صوره وتعيش حياه سعيده باءذن الله
🌹قول لنفسك كلام حلو وإيجابي دايماً وشجعها(انا قوى،انا ناجح،انا شجاع ومقدام،انا محبوب،)،وما تستناش غيرك يسمعك كلام حلو لانك ممكن تستنى كتير🌹اختار الناس اللى بتصاحبهم وابعد عن الناس المحبطه🌹عبر عن نفسك دايماً بأسلوب واضح وبسيط وراقى ولا تكبت مشاعرك🌹انت محتاج كل يوم على الأقل عشر دقايق فى سكون وهدوءعلشان تخرج شويه بره دائره افكارك وترسم لنفسك اجمل صوره لأجمل إنسان