مساء الخير
مساء الورد
مساء الفول
لما بصحى الصبح احب اكل اما
كرواسون
اما بيتى فور اما واحدتين كعك اما واحدتين غريبة وبقولكم بقا الغريبة بتبقى دايبة كدا مع كوب الشاى او فنجان قهوة وياسلام لو شوية نسكافية من غير لبن
المهم النهاردة الكعك والبيتى فور والغريبة
الكعك
مقاديرة
1كيلو دقيق
550 جرام سمنة بدرجة حرارة الغرفة
ربع ملعقة ملح
نصف ملعقة سكر
100 جرام سمسم محمص
10 جرام خميرة
ريحة كعك
100 جرام لبن
الطريقة
المهم تكون السمنة طرية ولا هى سايحة ولاهى متماسكة جدا هنضربها كويس بايدينا الاول لحد متبيض ننزل بالدقيق والملح والسكر وريحة الكعك والسمسم مع التقليب وفى الاخر ننزل باللبن مع الخميرة ندوب الخميرة مع اللبن ونزلها على العجين ونقلب هتكون عجينة دهنية نقطعها كور وننقشها على اى شكل منقوش وترص فى صوانى وتترك نصف ساعة تخمر وتدخل الفرن تستوى على درجة حرارة 160 لمدة تلت ساعة حسب امكانيات الفرن يطلع يرش سكر بودرة بالهنا والشفا

ثانيا البيتى فور الجميل الناعم
750 جرام زبدة
300 جرام سكر بودرة
6 بيضة
فانليا
1 كيلو دقيق
الطريقة هنضرب الزبدة مع السكر لحد متبيض وننزل بالبيض ونضرب دقيقتين وننزل بالدقيق على اليد مع التقليب ونجيب كيس حلوانى ونقطع الشكل اللى نحبة على صوانى ولو عاوزين بيتى فور لونة شوكلت ننقص من مقدار الدقيق 50 جرام دقيق ونحط مكانة كاكاو خام غامق وتدخل فرن 150 لمدة تلت ساعة يطلع ابيض شوية متحرقهوش ونسيبة يبرد ونفنشة زى منحب كما بالصورة اما نلزقة بالمربى او الشيكولاتة او جوز الهند او شيكولاتة وفستق حسب رغبة حضراتكم

الغريبة
المقادير
1 كيلو دقيق
500 جرام سمنة
250 جرام سكر بودرة
1 ابيض بيض
غريبة علشان تكون ناعمة نضرب السمنة مع السكر البودرة كويس بمضرب كهربى او بايدينا لحد متنعم السمنة ننزل بيياض بيضة واحدة منقلب وفى الاخر ننزل بالدقيق مع التقليب على الهادى نكور العجينة كور وترص فى صوانى ونحط فى وسطها اما نقطة مربى او خرذة الماس حسب انتى عاوزة تزينية ازاى وتدخل فرن 100 لمدو نصف ساعة يسوى على درجة حرارة هادية علشان تطلع معاكى لونها ابيض وناعم تستوى وتطلع ممكن نزينها بالشيكولا و جوز الهند