فن تضييع الوقت ٠٠٠

بما أنى عارفه ان أغلبنا بيتقن هذا الفن فالموضوع مش حا نطول فيه فى الكلام هى مجرد دردشة وملاحظات يمكن من خلالها نعرف قيمه الوقت ونحاول ان نتعلم فن اداره الوقت فى نقط مهمه لازم نتفق عليها لو بجد عايزين نشترى وقتنا وعمرنا ونحافظ عليه من الضياع

النقطة الاولى : فى صاحب قا عد جنبك طول الوقت حاول تبعد عنه شويه وتخلى بينك وبينه مسافه عشره متر على الأقل وجوده معاك فى نفس الأوده هو اكبر مدمر للوقت ،حاول تخصص له وقت معين فى يومك بعد الانتهاء من كل مهماتك واشغالك،والصاحب ده كلنا عارفينه مش محتاجه اقولكم اسمه لانى بستعمله دلوقتى لكن الحمد لله بحاول أقول كلام مفيد علشان ما أضيعش وقتى ووقتكم،واحرص على مصاحبه( مصحفك سبحتك،سجادهالصلاه،كتاب مفيد تقرأه ،وكتيب به اذكاراليوم واليله )دايماً خليهم جنبك علشان ماتكسلش تقوم تدور عليهم

النقطه الثانيه: وهى السرحان،والأفكار الكتيره يا اما فى الماضى الجميل او المستقبل اللذيذ،وتضيع اللحظه الحاليه اللى هى الوقت الحقيقى اللى المفروض نركز فيه،لان الماضى انتهى ولن يعود ،والمستقبل ،فى علم الغيب،والحاضر هوما نملكه،راقب افكارك،وعيش اللحظه بجسدك وعقلك وروحك،لانهاهى راسمالك الحقيقى،فلا تبيع الحقيقه بالوهم

النقطة الثالثه : هى عدم وجود خطه واضحه فى ذهنك ليومك وتكون جزء من خطه اكبر لحياتك وتكون مكتوبه ومتوثقه ،علشان ما يبقاش الموضوع مجرد كلام ولو عايز تفاصيل اكتر عن هذا الموضوع حا تلاقى على الصفحه موضوع اسمه كراسه وقلم واستيكر

النقطة الرابعه : هى اننا محتاجين نراقب نفسنا لمده كام يوم علشان نعرف وقتنا بيضيع فى ايه لان اى حاجه احنا بنعملها بتبيع لها جزء من وقتنا اللى هو جزء من عمرنا اللى ربنا حا يسألنا عنه يوم القيامه وعن الاشياء اللى احنا اشترناها به فهل كلنا مستعدين الإجابه عن هذا السؤال بدون خجل من أنفسنا امام الله،الذى وهبناالوقت لنشتري به أنفسنا ونعمر به دنيانا واخرتنا ولكننا للأسف نضيعها فى تلك الاشياء التى تسرق منا الوقت بدون ان ندرى حتى اننا أصبحنا اساتذه فى تضييع الوقت،مع تمنياتي لى وللجميع بحسن اداره الوقت والعمر قبل فوات الاوان